Serie A an inchingfel dawn hnai

Champion an awm thut thei tawh a, match tawp ber nghah a ngai thei bawk a, match tawp ber hnuah playoff hmanga champion zawn a ngai mai thei bawk, tun aṭanga rei lote hnuah Serie A an inchingfel tawh ang.

Pathianni zan dar 12:15-ah Serie A match pakua an khel dawn, hmahruaitu Napoli chu Parma khelmualah an lenglut dawn a, an chak bakah inkhel dangah Inter Milan an chak lo a nih chuan Antonio Conte naute an champion dawn a ni.

Naples club hian Inter Milan aiin point khatin an hmu tam zawk mek - an khingpui tur Parma hi tla thei zinga mi an la ni a, an la him loh miau avangin point duha tuihal an ni a, chetsual thut theihna tur an ni ang.

Conte-a'n a midfielder Stanislav Lobotka chu kerek hliam vangin a chhawr thei dawn lo a, winger David Neres erawh a dam tawh, an match hnuhnunga Genoa nen an inhnehtawk ṭumin a inkhel thei tawh, tun ṭumah chuan bul a ṭan thei tawh ang.

Inter Milan tan an nomawi humhim turin chetsual a thiang tawh miah lo thung. An mikhual Lazio hi an chet fuh loh lai a ni a, an league match hnuhnung pakuaah vawi thum chiah an chak. Mahse, Champions League khelh beiseina an la neih avangin hmachhawn an harsa dawn.

Simone Inzaghi naute hi UCL final khelh hmabak an ni thung a, European football inelna sang ber aiin Serie A an ngaihpawimawh hmasak a ngai - a tawp thlenga beiseina nei tur chuan zaninah an chak a ngai a ni.