Pathianni zanah Barca tan nomawi

May 18, Pathianni zan dar 10:30-ah league match khel turin Barcelona an inlan zui dawn a, La Liga champion hlim club hian Villarreal an mikhual dawn - he inkhelah hian Catalan club hi La Liga nomawi hlan an ni ang.

Mahse, Barca-in Pathianni zan an nghak hman tawh lo! Nizan khan Catalan club hian 'open-top bus parade' neiin, domestic treble champion an nih chu an lawm a, Barcelona kawtthlerah fan-te nen Spanish football roreltu an nih chu an lawm.

Barca boss Hansi Flick chuan, "Nuam ti takin lawm rawh u. Kawtthlera champion kan lawm hunah chuan a hnung lamah dingin, thil thleng ka lo thlir ang.

"Mipui hlim hmel hmuh hi ka tan chuan thil ropui ber a ni a, Barcelona kawtthlera champion kan lawm chu fan-ten nuam an tih ka beisei," a ti a, mipui hlimna thlentu nih chu a tan lawmman ropui ber a nih thu a sawi.

Barca player-ten Espanyol khelmuala champion an lawmin, buaina tenau a chhuak hman a, Flick hian a player-te chu dressing room lama lawm turin a hrilh zui - a chet dan hian fak a hlawh hle.

Flick chuan, "Espanyol khelmuala champion lawm kha a fuh lo. Kan khingpui fan-te kan zah ve a ngai. Dressing room-ah kan lawm a, a nuam kan ti lutuk," a ti a, Espanyol coach Manolo González chuan, "Pa hawihhawm tak a ni e," tiin Flick-a chet dan chu a fak.