Chenna ngai loh ramah Crystal Palace

FA Cup 2025 final-ah Crystal Palace-in Pep Guardiola kaihhruai Manchester City chu 1-0 a hnehin, an club history-a a vawi khat nan an champion. Wembley Stadium-a inkhelah Eberechi Eze chuan minute 16-naah goal awmchhun a khung a, Man City-in a chhanletna an nei lo.

Inrinni zan inkhelah City chungnung zawk mah se an tumah Palace an chiang a, counter attack hmangin goal an khung. Chutihrualin Palace an vannei a, keeper Dean Henderson-a'n Erling Haaland-a goal khung tur chu box pawnah a kutin a khawih a, VAR hmanga an ennawn chungin an hnawt chhuak lo.

Henderson hi 'hero' a ni zui a, defender Tyrick Mitchell-a'n Bernardo Silva laka penalty chawiin Palace keeper hian a dang. Penalty pettu hi Haaland ni loin Omar Marmoush a ni a, inkhelh banah Henderson hian Egyptian forward petna tur a rin lawk thiam thu a sawi. Man United keeper hlui Henderson hian champion nomawi hi a pa tan a hlan a, a pa Dougie Henderson hi nikum July thla khan a thi.

Palace champion puitu coach Oliver Glasner chuan, "Kan hlawhtlinna hi nomawi a ni ringawt lo. Min ṭantute tana an dam chhunga hun bik kan siam a ni," a ti a, a sawi hi a dik hle. Hei chauh hi a ni lo, Palace hian April thla khan City hi 5-2 in an hneh lo. Glasner chuan, "Inkhelh zawh khan Pep-a hnenah ka sawi a, kan intawng leh a nih chuan hetiang hian lo khel tawh suh u. A khelh dan kan thiam tawh dawn, tih ka hrilh," tiin a sawi a, Wembley Stadium-ah a thusawi dikna hmuhin a awm.

Palace ṭantu kum upa tam tak chuan media hmaah kan dam chhungin champion hi kan inring lo, tiin an sawi. Hei hian an champion hlutzia a sawifiah a, mipui chet danah an lawm tih a chiang em em bawk. Season thar ṭan nan Palace hian Community Shield an khel bawk dawn.

Man City erawhin Pep Guardiola hnuaiah tun season-ah nomawi an chawi lo a, an club legend Kevin de Bruyne an thlah danah an lawm mawlh lo ang. Goal khung khawl Erling Haaland-a'n Wembley Stadium-ah goal a khung lo chhunzawm a, penalty pettu ni sia final-a an pet tir ngam lo erawh sawi zui a tam hle.