Real-in Huijsen an la lut

FIFA Club World Cup-ah Real Madrid-in chet nat an tum a, season tawp hma hauhin transfer bazar-ah thawm an nei nghal char char - Bournemouth defender Dean Huijsen chu pound maktaduai 50-in an lei a, June 1-ah Santiago Bernabeu a pan nghal ang.

Kum 20 mi centre back hian Santiago Bernabeu-ah kum nga chhung atan contract a ziak a, kum khatah euro maktaduai kua a hlawh dawn niin an sawi. A hlawh hi kum tin a pung ang a, a kum nganaah chuan season khatah €11mtd a hlawh phak tawh dawn.

Real hian a man zat hi instalment-in, vawi thum pekah an hmang dawn a, Real-in June 18-a Club World Cup match hmasa bera Al Hilal an hmachhawn hunah a inlan thei tawh ang.

Netherlands-a piang, Spain-a seilian, La Roja tana inlan thlangtu, Huijen-a man hi a club hlui Juventus (10%) leh a academy awmna Malaga (5%) ten an dawng ve dawn bawk a, Cherries-a hming a chher hma hian Juventus bakah AS Roma (loan) ah a khel hman.

Huijsen hian season ṭan dawn khan Cherries hi £12.6mtd-in a zawm a, £15mtd thlenga sang chho thei tura tih niin, £50mtd ngawtin kum khat lekah an hralh ta - an lakluh theih nan hian khatihlaia Roma General Manager, tuna Bournemouth president (football operations) Tiago Pinto chu a ṭangkai hle.

Huijsen leitu tur Real hian official takin la puang lo mah se, Bayer Leverkusen aṭangin coach Xabi Alonso chu an la lut dawn a, Liverpool defender Trent Alexander-Arnold an la lut dawn bawk.