Liverpool-ah Bradley a cham dawn

Premier League champion Liverpool right back Conor Bradley chuan Anfield-a khelh chhunzawm zel turin contract thar a ziak a, Reds-ah kum li dang khel turin contract thar hi a ziak a ni.

Liverpool hian first choice right back Trent Alexander-Arnold chu Real Madrid lakah an chân dawn a, Bradley atan season thar aṭang chuan khelhna hmun a tam sawt tura ngaih a ni - contract thar a ziak zui.

Hetihrual hian Reds hian Bayer Leverkusen aṭangin Jeremie Frimpong an la lut hnai tawh a, Dutch full back hian Anfield a pan ngei a nih chuan Bradley-a elpui tur a ni ang.

Kum 21 mi Bradley chuan, "Contract thar ka ziak thei hi ka lawm a, zinkawng kan zawh ho turten min tiphur hle a ni," a ti a, Liverpool chuan hmabak êng tak an neiah a ngai.

Northern Ireland international chuan, "A pawimawh ber chu rim taka thawh chhunzawm zel a ni a, senior team nen kum hnih hlimawm tak kan hmang ho tawh. A bik takin loan-a hun hman zawh hnuah season hmasa kha duhawm takin ka hmang a, tun season-ah ka chhunzawm thei a, ka hlim hle. Hun hlimawm zawk kan tawn zel pawh ka beisei," a ti.

Bradley hi Liverpool academy chhuak niin, Under-21 tana a khelh hnuah, 2021-22 season-ah khan senior team tan match nga khelin, 2022-23 kha Bolton Wanderers-ah loan-in a khel a, League One club-ah hian club chhunga mimal chawimawina chu a hui deuh vek.

Season hmasa khan inelna hrang hrangah match 23 khelhsakin, tun season-ah match 27 a khel tawh bawk. Reds hian Frimpong an lakluh dawn bakah Leverkusen tana a khelhpui Florian Wirtz an beisei mek bawk a, inthuam ṭhat an tum hle.

Reds hian zanin dar 12:30-ah Brighton & Hove Albion lenchilhin, Premier League match an khel dawn a, May 25, Pathianni zanah Crystal Palace mikhualin, tun season-a an league match hnuhnung ber an khel ang a, Premier League nomawi hlan an ni bawk ang.