Scottish champion Celtic chak zo lo

Scottish Premiership pawh a tawp khar a ni ta a, champion Celtic chu an match hnuhnung berah an chak zo lo - an mikhual St. Mirren nen 1-1 in an inhnehtawk a, point 92 hmu chungin season erawh an khar ta tho.

Celtic hi chak lo thei dinhmunah an ding hman zawk hial - mikhual team tan Jonah Ayunga chuan minute 51-naah goal hmahruai a khung a, Scottish champion hian si phurh sutna an nei thei lo reng.

Mahse, hun pek belh minute linaah James Forrest a inlar a, si phurh sutna goal a khung. Kum 33 mi winger tan season 16 zet a zawna Scottish top flight league-a goal a khungna a ni a, record a ni.

Brendan Rodgers-a enkawl Celtic hi season tluanin match 38-ah vawi li chiah an tlawm a, pahnihna Rangers aiin point 17 ngawtin an hmu sang zawk.

Celtic hian league khel zo tawh mah se, match khat khelh tur an la nei a, May 24, Inrinni zanah Scottish Cup final khelin, Aberdeen chu khualmualah an lenchilh ang - an champion leh chuan domestic treble nomawi an chawi dawn tihna a ni.

Scottish club hlun hian Premiership bakah League Cup an champion tawh bawk a, a lungthu kim nan Scottish Cup champion leh an tum ang.