An ramah Paolini a champion

Italy mipui te chuan kum 40 chhung an nghah hnuah, an khawtual nula ngeiin Italian Open nomawi an chawi lai an hmu ta - Inrinni zan khan Jasmine Paolini chuan Coco Gauff hnehin a champion.

Rome khawpuia inkhelah Paolini hian US nula Gauff hi 6-4, 6-2 in a hneh, hnehna chang tur hian darkar khat leh minute 29 chhung hun a hmang a, amah mai bakah Italy ram tan chanchin lawmawm a thlen.

Italian Open hi kum 1930 aṭang khan khelh ṭan a ni a, kum 1985 khan Raffaella Reggi a champion - ani hnuah tualchhung nula hlawhtling an awm thei lo rei hle, an record duhawm lo tak hi Paolini hian a rawn thaichhe ta chiah a ni.

Kum 29 mi Paolini chuan, "Ka kuta nomawi ka chawi hnuah pawh khan awih mai harsa ka la ti hial, ka duhthusam leh suangtuahna te kha tunah chuan a takin ka tawng ve ta," tiin a sawi.

Season hmasa khan Paolini hian French Open leh Wimbledon final a lut a, mahse nomawi inchuhna inkhelah a vanduai zawkah a ṭang ve ve, kuminah hlawhtlina beiseina a nei sang sawt ang.