IPL khelh hun an sawn
India rama cricket thuneitu sang ber Board of Control for Cricket in India (BCCI) chuan nimin khan Covid-19 vangin Indian Premier League 2020 chu thuleh awm hma atana sawn a nih thu an puang.
BCCI secretary Jay Shah chuan, "Covid-19 vangin mipui hriselna thlir hmasak a ṭul a, India sorkarin lockdown a pawh sei bawk avangin BCCI hnuaia IPL Governing Council chuan IPL 2020 chu thuleh awm hmaa khelh lo turin thutlukna a siam. Ram pum damna hi kan ngaih pawimawh hmasak ber a ni a, khelh theih tura a him veleh inelna hi ṭan a ni ang," tiin a sawi.
Twenty20 inelna hi a tirah chuan March 29 khan khelh tura tih a ni. Amaherawhchu, Covid-19 vangin a hun hi sawn a ngai a, ruahman dan chuan April 15, Nilaini khan khelh theih beisei a ni. Mahse, Thawhlehni khan prime minister Narendra Modi chuan coronavirus darh zel tur ven nan May 3 thleng ram pumah inkharkhipna kaltlang pui tur a nih thu a sawi a, IPL hmalam hun a chiang tawh lo.
IPL Governing Council member pali zinga mi Mamon Majumdar chuan inelna ṭan hun hi September thla pawh a nih daih theih thute Vanglaini a hrilh tawh a, Cricket Association of Mizoram honorary secretary Mamon hian inelna kalphung pawh thlak a ngaih theih thute a lo sawi tawh a ni.