Premier League club-in kal zel dan tur sawiho dawn
Coronavirus vangin Premier League chawlh rih a ni a, vawiin hian club-ten 2019-20 season kal zel dan tur an thlirho ang. Tuna a lan danah chuan May thlaah inelna chhunzawm theih a rinawm lo a, club thuneitu chuan contract buai loh dan tur zawn an duh.
June 30 hian player ṭhahnem tak contract hi a tawp dawn a, chung zingah chuan Chelsea midfielder Willian leh Tottenham defender Jan Vertonghen te chu player langsar a ni. Hemi belhchhah tur hian Liverpool chuan an thawmhnaw siamtu company chu New Balance aṭangin Nike-ah an thlak dawn a, Watford leh Newcastle te pawhin kit supplier an thlak dawn bawk.
Khawvela football thuneitu sang ber FIFA pawhin harsatna hi an hrethiam a, hun rei lote chhung contract pawhsei dan te an ngaihtuah. Chutihrualin dan ang chuan club-in player an ti lui thei lo a, chumi awmzia chu June 30 hnua inelna a la kal zel a nih chuan club-in season kal laiah an player pawimawh an chan thei dawn tihna a ni.
Vawiina club inhmuh khawm hunah hian harsatna zawng zawng chinfel a ni dawn lo a, chutihrualin tun ṭumah hian club 20-in ngaihdan an thawh dawn avangin thutlukna mumal zawk awm turin a beisei theih ang.