Vawiin aṭangin last 32 khel ṭan dawn

LBS Suzuki 22nd Inter Branch YMA Football Tournament 2025-ah vawiin aṭangin round of 32 khelh ṭan a ni dawn a, a ṭha 32 ni loin a thleng sang 32 tihna a ni thei ang. Tun ṭum inelnaah hian seeded pariat chauh an awm avangin team a insem rual lo a, round sang deuhah pawh insawp hi la awm thei an ni.

RG Stadium-ah Bawngkawn an inlan dawn a, Reiek lakah MS Dawngliana, H. Lalmuankima leh ISL player F. Lalremtluanga te awmna team hi an buk rit deuh dawn. Bawngkawn tan last 16 chauh ni loin quarterfinal thleng pawhin kawng a inhawng zau hle.

Match hmasa bera inkhel tur erawh Hmunṭha leh Tlangpui an ni a, intum tawk viau tura ngaih an ni. Hmunṭha hian futsal khelh thiam Lalhmingmuana an kawl a, Venghlui an hmachhawn ṭumin goal ropui a khung. Tlangpui striker Lalhlupuia'n MPL club enkawltu mit a la ṭan bawk.

Chhun dar 12:15-ah Lungdai leh Kanan Veng te an inkhel dawn a, Lungdai hian vawi hnih champion tawh Ramhlun South an hneh theih avangin vawi khat champion Kanan Veng hi an hlau hran lo ang.

1st Bn MAP Ground-ah Armed Veng South-in chawhma dar 11:00-ah Darlawng an hmachhawn dawn. AVS hi champion rinkai an ni a, an training-na hmuna khel tur an nih bakah entu an neih ṭhat dawn avangin Darlawng tan tlarhnung ven ṭhat a ṭul ang.

Chawhnu dar 1:15-a inkhel tur Hualngohmun leh Kawnpui Venglai hi vawiin inkhela hmuhnawm ber tur zawk a ni. Hualngohmun hian Vanlalthanga leh Lalhmunmawia (Ahmuntea) te an kawl a, Kawnpui Venglaiin ke vei lam hmang thiam Lalengmawia an nei thung.