LBS Suzuki CYMA Football - Team ṭha bik Durtlang inlan hun

LBS Suzuki 22nd Inter Branch YMA Football Tournament 2025-ah inelna ṭan hma aṭanga team ṭhaa sawi chu Durtlang an ni a, vawiin chawhma dar 11:00 hian Chite Playground-ah Ainawn an hmachhawn dawn. Chawhnu dar 1:15-ah Kanhmun leh Chawnpui an inkhel bawk ang.

Inkhel pahnih hi team 64 awmna third round match hnuhnung pahnih a ni a, Muallungthua khelh tura ruahman ni mah se Chite Playground-ah sawn a ni. Durtlang hian player ṭha an ngah ngang mai. ISL player Hmingthanmawia, Isaac Vanmalsawma leh Lalchungnunga te an kawl a, I League player Lalfelkima te an neih bakah inelna sanga tawnhriat nei tawh Ricky Lallawmawma, Lalliansanga (Notea), Lalmuanzova, Joseh Lalsanglura leh Joseph Vanlalhruaia te an kawl.

Ainawn lakah coach Malsawmdawngliana enkawl hi chak tura rinkai an ni a, mahse Durtlang hi an ṭha bek bik lo - keeper ṭha an nei lo. Mamit Hmar Veng lakah pawh 2-1 chauhin an chak a, 1st Bn MAP Ground aia field zim Chite Playground-ah khelh an harsat hret ang. Chutihrualin Ainawn hian Chanmari FC winger Lalthankima (Thathana) bak chu player langsar an nei lo a, chak tur chuan an vanneih tel a ṭul dawn a ni.