Chak vek kan duh - Mizoram coach

Swami Vivekananda Men’s U20 National Football Championship-ah Mizoramin match thum an khelh tawhah chak vekin quarterfinal an lut tawh a, vawiin tlai dar 4:15 hian group match hnuhnung berah Jharkhand an hmachhawn dawn. Mizoram coach Lalrindika Hmar chuan, "Quarterfinal kan thlir a ngai tawh a, chuvangin yellow card hmu tawhte hi hahdamna hun kan pe ang. Chutihrualin chak vek kan tum," tiin Vanglaini a hrilh.

Ramakrishna Mission Ashrama, Chhattisgarh-a inelna neihah hian Mizoramin Maharashtra, Himachal Pradesh leh Tripura te an hneh tawh a, vawiina an hmachhawn tur Jharkhand hian an match hnuhnung berah Himachal Pradesh 2-1 in an hneh. Chutihrualin an khelh tawhna aṭanga thlir chuan Jharkhand hian Mizoram an el pha lo, player ṭha ṭhenkhat awltir chung pawhin Mizoram hi chak tura rin an ni.

Mizoram player zingah F. Malsawmtluanga (left back), Laldawngzuala (centre back), Lalbiaksanga (midfielder) leh Ngurthanmawia (winger) ten yellow card an hmu tawh a, vawiin hian an awl a rinawm. Chutihrualin team khatah hian player 18 chauh an awm avangin a ṭul dan a zirin an lut thei tho ang.

Group D-ah Mizoram hi pakhatna an ni chiang tawh a, group C-a pakhatna Punjab nen quarterfinal-ah an inkhel dawn. Nimin zing khan Punjab-in Ladakh 8-1 in an sawp a, pakhatna dinhmun an nemnghet. Punjab hian elpui Uttar Pradesh 2-1 in hneh lo mah se Manipur 1-0 a an hneh theih avangin an tawh a khirh ang. Quarterfinal hi May 23, Zirtawpni zing dar 7:30-a khelh tur a ni.