Tuichangral hmaah TNT

Zanin dar 8:00 hian EverHome Pro Volleyball League 2025 chu semifinal hmasa zawk khelh a ni dawn. League hmahruaitu Tuichangral hmaah palina Thutak Nunpuitu Team an ding dawn, pakhat zawk chauhin final luh theih a nih avangin inkhel a hmuhnawm ang.

League match hnuhnung berah Tuichangral hian Sihphir an hneh a, an result avangin TNT hian semifinal an lut; anmahni vanga tlang an hmachhawn dawn tihna a ni a, zahngaihna lantir erawh a remchang dawn lo thung a ni.

Team pahnihte hi April 29 khan an lo intawng tawh, inelna hmang ṭha tak Tuichangral hian 3-1 in an hneh. An intawn hmasak hian Tuichangral lamin tualchhung player aiin state pawn aṭanga chah luh an hmang ṭangkai a, zaninah pawh an innghahna tur a ni leh ang.

TNT hi Mizo tlangval hlanga inelna hmachhawn awmchhun an ni, an thiampuipa Vanlalṭanchhana thlawp turin Zosangzuala. Saidingpuia Sailo leh Sadrak Fanai te an nei, an khelh fuh ṭum chuan hnam dang player ṭha bik awmna team hneh turin theihna an nei.

Tuichangral hian PVL nomawi an la chawi ngai lo a, an champion dawn a nih chuan kumin hi an tan hun ṭha bik a ni ngei ang. League round bikah an sang ber a ni satliah lo a, match hnuhnung khelh hmain semifinal an lut fel diam tawh.

Zaninah Rajneesh Singh chu an rinrawl a ni leh dawn a, ani thlawp tur hian Zomuansang, Johan Vanneihsanga leh R. Vanlalmawia te an nei, coach tawnhriat ngah David Aizawmpuia Fanai hian TNT vuak dang turin a naute remkhawm a tum ngei ang.