Barcelona-in nomawi an chawi ta

La Liga champion an nih hnua an inkhel hmasa berah Barcelona chu champion nomawi hlan an ni a, mahse, nomawi hlan hma inkhelah Villarreal chu 3-2 in an ngam lo - Barca tan result-in awmzia a nei tawh lo a, Villarreal tan erawh Champions League khel tura an dinhmun chinfelna a ni thung.

Yellow Submarine tan Ayoze Pérez chuan hma takah goal hmahruai khungin, Barca hian Lamine Yamal leh Fermín López hmangin chhanglet mah se, mikhual team tan Santi Comesaña leh Tajon Buchanan ten an khung ve leh a, 3-2 in an chak daih!

Hetihlai hian beisei tur nei tawh lo Real Madrid pawh an chak a, 2-0 in Sevilla an hneh. Real tan Kylian Mbappé leh Jude Bellingham ten goal khat ve ve an khung a, Sevilla lamah Loïc Badé leh Isaac Romero ten red card an hmu thung.

Atlético Madrid chuan 4-1 in Real Betis an sawp a, Julián Álvarez chuan goal hnih khungin, Robin Le Normand leh Ángel Correa ten goal khat ve ve an khung - Betis tana Pablo Fornals khungin awmzia a nei phak lo.

Barca an tlawm!

Zirtawpni khan Barca-in domestic treble champion an nih chu Barcelona kawtthlerah an lawm a, fans 650,000 chuang an pungkhawm! Pathianni zanah an champion hnua an match hmasa ber an khel zui a, mahse, minute lina lekah goal an chhuah zui!

Ayoze Perez chuan minute linaah goal hmahruai a khung a, Barca tan Lamine Yamal chuan mawi zetin si phurh sutna goal a khung - chawlhlawk hmain Fermín López chuan a belhchhah ve leh a, 2-1 a ni der.

Mahse, UCL khelh duh Villarreal an tlawm mai duh bik lo. Second half ṭan aṭanga minute nganaah Santi Comesana inlarin, Yeremy Pino-a through ball ṭha tak chu Barca keeper Marc-Andre ter Stegen pet khumin goal-ah a chantir.

Hun tawp nan minute 10 chiah a awm tawh tihah Tajon Buchanan chuan khung lehin, Villarreal an chak ta daih - Real Betis tan um phak theih an ni ta lo a, season tharah UCL an khel ang.

Real an chak

Season duhawm lo tak hmangtu Sevilla an tho hleithei lo. Minute 12-na lekah Loic Bade chuan Mbappe a tihtluk avangin red card a chawi a, second half ṭan aṭanga minute thumnaah Isaac Romero chu hnawhchhuah zui a ni!

Real-in hun tam zawk player tam zawk niin khel mah se, first half-ah goal an khung thei lo a, second half-ah bench aṭanga luhtir Romero chu hnawhchhuah a ni ve leh - Aurelien Tchouameni a tackle avangin yellow card pek a ni zet a, video assistant referee (VAR) rawn a nih hnuah referee-in red card a pe.

Romero hian khelmualah minute khat pawh hun a hmang hman lo. Real-in minute 75-naah a tam zawk an nih an chhawr ta nge nge a, Mbappe chuan tun season-a a league goal 29-na a khung - top scorer a ni ngei dawnin a lang.

Hun tawp nan minute thum chiah a awm tawh tihah Jude Bellingham chuan a belhchhah ve leh bawk a, 2-0 in Real-in hnehna an chang.