A tawp niah Serie A an chingfel dawn

Inter Milan chuan a chung bera lawn kai theihna remchang an neih an bawhpelh a, nomawi humhim tur chuan Serie A match tawp ber an nghah a ngai dawn - an chunga mi Napoli chetsual an ngaihchan tel a ngai dawn bawk.

Boruak a sang a, team manager pahnih Antonio Conte leh Simone Inzaghi te chu hnawhchhuah an ni ve ve a, league match tawp berah Conte leh Inzaghi hian an naute an kaihruai thei dawn lo, an intluk tawk chho hle a ni.

Pathianni zan khan a rualin Inter Milan leh Napoli an inlan a, an chak zo lo ve ve. Inter Milan hian hun tawp dawnah penalty chawiin Lazio nen 2-2 in an inhnehtawk; inkhel dangah Naples club hi Parma nen goal lut loin an inhnehtawk ve bawk a ni.

Inter Milan tan hian Yann Aurel Bisseck-a'n chawlhlawk hma hretin goal hmahruai a khung a, mikhual Lazio lamin Pedro hmanga an sut hnuah Denzel Dumfries hmangin Inter bawk chungnung leh mah se, hun tawp hma lawkin Pedro bawkin penalty a khung.

An league match tawp berah Inter Milan hian Como an lenchilh dawn, league match hnuhnung ber thlengin thapui an thawh a ngai dawn; chumi hnuah Champions League final khelh tur an la neih avangin hmabak a hautak dawn hle.

A tawp niah Napoli chuan Cagliari an mikhual dawn thung a, an chak a nih chuan midang result ngaihchan tel ngai loin an champion nghal dawn - Conte enkawl Naples club kutah engkim a awm tiin a sawi theih.