Turkey-ah Galatasaray champion

European football-a league ngaihven hlawh pawl, Turkish Super Lig-ah Galatasaray an champion a, Pathianni zan khan Kayserispor chu 3-0 a hnehin, match hnih khelh tur la awm mah se, an champion chiang tawh.

Galatasaray tan zan danglam bik a ni - an goalkeeper Fernando Muslera chuan an goal thumna hi a khung. Kum 38 mi keeper hian Turkish club-ah hian kum 14 zet hun a hmang tawh a, season tawp rual hian a chhuahsan tawh dawn.

Hei vang hian Galatasaray-in an keeper chhuanvawr chungah an duhsakna an lantir a, hun tawp hnaih lama an penalty hmuh chu Uruguay international hlui tan an kian. Lazio keeper hlui hian goal-ah a chantir a, Galatasaray tana match 550-a khelhnaah a goal hnihna a khung.

Muslera hian Galatasaray-a a season hmasa berah penalty hmang vekin goal a lo khung tawh a, a season 14-naah a chhunzawm leh ta chiah! Turkish champion tan hian Victor Osimhen chuan goal hmahruai a khung a, Baris Alper Yilmaz chuan a khung ve bawk.

Galatasaray tan league nomawi 25 an chawina chiah a ni a, Jose Mourinho enkawl Fenerbahce erawh a zawna season li nan pahnihna an ni leh ta. Pathianni zanah chak ve tho mah se, awmzia a nei phak ta lo.

Fenerbahce hian Eyupspor chu 2-1 in an hneh a, Youssef En-Nesyri leh Edin Dzeko ten goal khat ve ve khungin, mikhual team tana Umut Meras goal khungin awmzia a nei phak lo.

Kum 26 mi Osimhen-a'n Turkey-ah hlawhtling takin loan-in hun a hmang a, inelna hrang hrangah match 40 khelin goal 36 a khung - season tharah chuan European club lian zawkten Napoli aṭanga lakluh tumin an hel leh ang.