Titans leh Kings ten playoff an lut

Indian Premier League-ah playoff khel tur pathum a hriat ta a; Gujarat Titans, Royal Challengers Bengaluru leh Punjab Kings ten playoff an khel dawn a, chutihrualin team dinhmun tur erawh a la chiang lo thung.

Pathianni khan Punjab Kings-in Jaipur-ah Rajasthan Royals chu 10 runs-in an hneh a, Gujarat Titans-in pakhatna dinhmun luah lailawk turin Delhi Capitals chu wicket 10-in an hneh ve bawk.

Sawai Mansingh Stadium, Jaipur-a inkhelah Punjab Kings-in vuak hmasak an thlang a, Nehal Wadhera-a'n 70 runs a siam zarah over 20-ah 219/5 runs an vaw chhuak. Rajasthan Royals tan target a sang hret a, over 20-ah 209/7 runs chauh an siam. Punjab Kings hian match 12 aṭangin 17 points an hmu a, pangana awm Delhi an chak loh bawk avangin playoff an khel dawn tih a chiang tawh.

Arun Jaitley Stadium, Delhi-ah mualneitu Delhi Capitals-in 199/3 runs an siam a, KL Rahul-a'n thi loin 112 runs a siam. Target chhia tih tur ni lo mah se Titans opener pahnih Sai Sudharsan (108*) leh Shubman Gill (93*) te a tawp thlengin an dam a, over 19-ah 205 runs siamin hnehna an chang.

Zanin dar 7:30 hian Chennai Super Kings leh Rajasthan Royals te an inkhel dawn a, club pahnihte hian beisei tur an nei tawh lo. Chutihrualin table mawngphaha season khar loh nan zanina chak hi a pawimawh ang.