Rugani leh Matuidi an dam fel
Juventus player Daniele Rugani leh Blaise Matuidi te chu an dam fel tawh. Covid-19 vanga enkawl an nih hnuah an hriselna dinhmun endik a ni a, an taksaah hri hi a awm tawh lo tih finfiah a ni.
Thla hmasa khan Rugani hi coronavirus a kai tih hriat a ni. Serie A player zingah chuan kai hriat chhuah hmasak ber a ni a, club tana a khelhpui dang pahnih Matuidi leh Pablo Dybala te pawhin hri leng hi an kai ve bawk.
Old Lady (Juve sawina) chuan thu chhuah siamin, "Player pahnih an dam fel tawh a, hri lengin tibuai tawh lo mah se in lamah enkawlna neih chhunzawm a la ni ang," an ti.
Hri leng vangin Serie A chawlh lailawk a ni a, league hmahruaitu Juve player pahnih hian an natna vang hian match ṭhulh an nei lo. Maurizio Sarri enkawl Juve hian match 12 khelh hmabak la awmah Lazio aiin point khatin an sang mek.
Engtik hunah nge league an khelh chhunzawm leh theih dawn a la hriat lo a, an inkhelh leh hmain Italian Football Federation (FIGC) chuan player zawng zawng an hriselna dinhmun endik an tum thu an sawi tawh.
FIGC president Gabriele Gravina chuan Juve hi an player enkawl danah a fak a, "League hmahruaitu an ni a, harsatna thleng chungchangah pawh entawn tlakin an awm," a ti.