Entu awm loa inkhelh a pawi lo - Nadal
Rafael Nadal chuan Covid-19 vanga infiamna khawvel buai mek chu pawi a ti thle a, a ṭul a nih chuan entu nei loa inkhelh mai pawh a hnial loh thu a sawi chhuak.
Hri leng vang hian tennis season kal lai chu an chawl lailawk vek a, a hma berah pawh July thla laihawl hma chuan inelna a awm thei rih dawn lo. World number 2 hi a chenna Mallorca-ah a awm mek a ni.
Grand Slam vawi 19 champion tawh Nadal chuan, "A tirah kha chuan inkhung kha a harsa ve deuh, mahse chawlh kar thum awm hnuah meuh chuan kan insiamrem hlawm tawh viauin ka hria.
"TV ka en a, news ka ngaithla ṭhin. A tirah kha chuan chanchin lawmawm lam hriat tur a awm lo a, nun kha a nuam lo in a hrehawm takzet, tunah erawh lawmna leh beiseina lam thu hriat tur a awm ve ta," a ti.
June thla a kum 34 tling tawh tur Nadal chuan sawi zawmin, "Inah taksa ka sawizawi ṭhat avangin eng hunah pawh inkhel turin ka inpeih. Infiamna dangte ang lo takin tennis chu zin kual nasat a ngai a, hei vang hian tournament khelh pawh a buaithlak deuh.
"Hriselna hi kan ngai pawimawh hmasa ber tur a ni a, chumi hnu lamah chuan entu nei loa inkhelh a ngai a nih pawhin kan pawmthiam tur a ni ang, a boruak erawh a danglam hle ang," tiin a sawi.
World number 1 Novak Djokovic pawhin a ṭul a nih chuan entu awm loa inkhelh a hnial lo. Serbian tlangval chuan, "Kan thunun theih loh thil a thleng a, duhthusam a sawi theih rih lo," a ti. Chhungkua a hun hman nuam a tih thu a sawi tel bawk.