Dortmund defender Zagadou a hliam
Borussia Dortmund chuan team training an nei ṭan leh tawh a, an defender Dan-Axel Zagadou chu inbuatsaihna an neihna hmunah hian a khup vei lam a hliam nghal.
German club Dortmund chuan, "Zagadou khup vei lam a hliam a, a dinhmun hi chiang taka sawi theih a la ni lo, endik a nih hnuah zai a ngaih leh ngaih loh a hriat ang," an ti.
European league lian hoah chuan Bundesliga club-te hi coronavirus darh hnua training nei leh hmasa ber an ni a, tun hma an training dan nen erawh a la inang lo. Hlawm hran hranah ṭhen hrangin a inhnaih lo thei angin an awm.
France under-21 international Zagadou hi season tir lam kha chuan Dortmund tan a khel phak lo, bench lamah a hun a hmang. Mahse, November thla aṭang khan hmun pawimawh a chang chho a, league bakah Champions League thlenga chawr rim a ni.