Juventus-a mipa 'naupang' De Ligt

Kum 20 mi Netherlands defender hi Polish YouTube channel Foot Truck-ah Juventus tana a khelhpui goalkeeper Wojciech Szczesny nen an inkawm a, Italian club ropuia a hun tawn hmasak lam chanchin a sawi hi a ngaihnawm hle. 

Kum 19 mi lek ni chunga Ajax captain ni thei a ni a, defender ṭha bik a nihna piahlamah hruaitu a ni tel chu De Ligt-a'n fak a hlawh ṭhinna a ni. Club langsar tak takin an duh chungin July 2019 khan Juventus pan a thlang a, a man zat chu pound maktaduai 67.5 a ni. 

Mahse, Juve-ah hian De Ligt-a beisei angin thil a kal lo hle. Pre season friendly-a Inter Milan an hmachhawn ṭumin an lamah a ti lut a, Dutch defender chuan, "En bik ka ni sa tawh a, pressure a awm belh nasa hle. Mahse, training-naah khan ka buai lo tih ka inhria a ni," tiin a riru paukhauh thu a sawi. 

De Ligt tan kawl a êng nghal lo - season ṭantir lama Lecce leh Torino an hmachhawn ṭumin a handball vangin penalty a chawi zui. Kum 20 mi defender chuan, "Ka kut chuan ball a hip bik ang maia an sawi ka hria a ni," tiin Juve-a a nun bul chu a awlsam loh thu a sawi. 

De Ligt-a'n Juve a pan hma hian Manchester United, Barcelona leh Paris St-Germain nen pawh sawizawm a ni a, mi tam tak chuan Juventus a pan chhan hi Cristiano Ronaldo-a'n Italian club zawm tura a sawm vang niin an sawi. 

Mahse, De Ligt chuan, "Ronaldo nen kan inbiak vang a ni lo. Ka club duh ber thlang tur khan inngaihtuahna hun tam tak ka nei a, uluk taka ngaihtuahna ka sen hnuah Juve pan kha a ṭha berin ka hria a ni," a ti.

 

De Ligt hi June 2019-a Netherlands leh Portugal inkhelh ṭumin Ronaldo nen hian an inbe ngei a, Juve a pan chhan erawh a ni lo. "Min rawn bia erawh chawimawina ropui tak a ni," tiin a sawi thung. 

De Ligt hi season hmasa khan Ajax tan league leh Dutch Cup-ah a champion a, Champions League semifinal a khel bawk. Dutch defender chuan, "Coach Erik ten Hag kha kan hlawhtlin nan a pawimawh hle. Ajax aiin Juve-ah hian ka khelh dan tur hi sawi lawk a awlsam zawk. 

"Ajax-ah chuan kan duh dana khel turin duhthlanna zalen tak pek kan ni a, player thutluknaah nasa takin kan innghat a ni," a ti a, Arsenal goalkeeper hlui Szczesny chuan, "Arsene Wenger hnuaia khelh nen a inang a nih chu," tiin a lo tui hnih. 

Szczesny chuan, "Football hmuhnawm tak kan pho chhuak fo a, mahse inbuatsaihna hranpa neia ti kan ni ngai lo. Wenger-a hnuaiah chuan kan theihna anga khelhchhuah a, nuam ti taka inkhelh kha a ni tawp mai," a ti. 

Centre-back De Ligt hian vanneihna tak pakhat a nei a, chu chu club leh ram tana khawvela central defender ṭha ber pawl pahnih a khelhpui hi a ni - Netherlands tan Virgil van Dijk nen an khel dun a, Juve-ah Giorgio Chiellini a khelhpui thung. 

Dutch defender chuan, "An khelh dan aṭanga lak chhawn a, hmasawn tum a awlsam em em a, mahse chutiang tur chu a ni lo tih ka hre tawh. A pawimawh ber chu an khelh dan zir reng chunga mahni style thlak loh hi a ni. 

"Ka ngaihdan chuan player tin hian mahni style kan nei ṭheuh a, kei chuan hmasawn ka mamawhna lai chauh ka en mai a ni," tiin a sawi a, khelhpuite khelh dan zawng zawng entawn vek a tum lo. 

De Ligt hian kum kua lek a upa nih laiin Ajax academy a zawm ṭan a, Ajax a zawm tirh hian amah enkawltu coach-te chuan, 'Che muang, ṭuanfum leh pianhmang dik lo," tiin an sawisel a, vawiinah erawh khawvela defender duhawm ber pawl a ni ta.

August 8, 2016 khan Ajax reserve team tan a match hmasa ber a khel a, September 21-ah Cup game khelhtir niin senior team tana a match hmasa ber a khel a, goal a khung nghal - October 24-ah senior team-a hlankai a nih thu Ajax chuan twitter kaltlangin an puang.

Davinson Sanchez-a'n August 2017-a Tottenham Hotspur a pan hnuah senior team tan hmun a chang chho ṭan a, 2017-18 season hian inelna hrang hrangah match 39 a khel - Dutch Football Talent of the Year-ah thlan a ni a, Eredivisie Team of the Year-ah a lang nghal bawk. 

March 2018 khan club captain Joel Veltman inhliam zarah captain armband pek niin Ajax tana captain ni thei naupang ber a ni a, December-a thlen meuh chuan Europe-a inkhel, kum 21 hnuai lam footballer ṭha ber chawimawina Golden Boy award hlan a ni - defender zinga he chawimawina dawng thei hmasa ber a ni. 

February 13, 2019-ah khan Champions League last 16-ah Real Madrid hmachhawnin captain armband a hreng a, kum 19 leh ni 186 mi niin Champions League knockout round-a captain ni thei naupang ber record a siam. 

Champions League-ah hian semifinal an thleng a, Eredivisie leh KNVB Cup-ah an champion bawk a, hemi hnua thil thlen zel dan erawh hrilh nawn kan ngai ta lo.