CYMA Football-ah Khawzawl Vs Aizawl

LBS Suzuki 22nd Inter Branch YMA Football 2025-ah group G chu group of death-a ngaih a ni a, vawiin hian Khawzawl team ṭha pahnih leh Aizawl team ṭha pahnih an inhmachhawn dawn. 1st Bn MAP Ground-ah chawhma dar 10:00 hian Khawzawl Zuchhip leh Republic Veng te an inkhel ang a, RG Stadium-ah chawhnu dar 2:30 hian Khawzawl Vengthar leh Chhinga Veng te an inkhel ang.

Zuchhip Branch YMA president hi Mizo footballer hlawhtling Robert Lalthlamuana a ni a, tun ṭumah hian Robert hi khel tawh lo mah se team dintu zinga mi a ni. Zuchhip hian coach atan Vanlalrova an chah chho a, East Bengal midfielder Vanlalpeka Guite an kawl a, an match hnuhnung berah Saitual Venglai chu 5-1 in an sawp bawk. Chutihrualin an khingpui tur Republic Vengin Samlukhai 6-0 in an sawp a, 2005 champion team hi Mizo coach ṭha Lalsangzuala Hmar enkawl an ni thung.

Khawzawl Vengthar hian champion rinkai zinga mi Lengpui an hneh avangin dah hniam theih an ni tawh lo a, anni hi Khawzawl chhunga team ṭha ber an nih bakah Sikkim-ah ṭum hnih ngawt I Day Football-a an champion avangin inrintawkna an ngah hle. Mahse, an khingpui tur Chhinga Vengah hian player fing R. Malsawmtluanga a la tel a, Rochharzela leh F. Lalnuntluanga te an neih bawk avangin zuam ngawt a rem lo. Chhinga Veng hian Aizawl FC aṭanga NE United zawmtu Lalrinzuala telna Serchhip Chhekhnai an hneh tlat.