EFL player-ten hlawh la tlem dawn
English Football League (Premier League hnuai lam league enkawltu) leh England-a Professional Footballers' Association chuan coronavirus hri leng vanga sum lama buai mek EFL club-te chu April atana player hlawh 25% chu pe rih lo mai turin an ti a, hetihrual hian he ngenna hian Championship club a huam ve lo ang.
Championship club-te hi chu anmahni duhdan anga thutlukna siam mai tura beisei an ni a, hetihrual hian April hlawh 25% la lo tur an tihah hian thla khata £2,500 (Rs. 2,38,722) aia tam hlawh phak lo player chu an tel ve dawn lo thung.
EFL leh PFA thuchhuaha a lan danin Championship club tam zawk chuan an player-te inremna an lo neihpuisa tawh a, chutianga inremna la nei ve lo te pawhin tun kar chhung ngeiin an player-te nen hian indawrna an nei dawn a ni.
March 10 aṭang khan English football chu chawlh a ni tawh a, club-ten match khelh tur an neih loh avangin sum lakluhna tur an nei lo. Premier League club-ten hei hi tuar ve bawk mah se a tuar nasa ber erawh league hniam lam club-te an ni.
Championship club Luton Town chief executive Gary Sweet chuan thuneituten hma an lak vat loh chuan EFL club-te dinhmun chu a derthawn vek tawh thu a sawi a, Premier League chuan April 3 khan EFL leh non-league club-te sum hman turin pound maktaduai 125 a lo pe tawh.
Mahse, pound maktaduai 125 aṭang hian pound maktaduai hnih chauh chu non-league club-te chan tur a ni a, League Two club Tranmere Rovers chairman Mark Palios chuan tun kar chhunga hmalakna lian tak an nei a nih loh chuan club-te chu an ral mai hlauhthawnawma an din thu a lo sawi tawh bawk.