Vawiin inkhel turte an intluk tawk hlawm

LBS Suzuki 22nd Inter Branch YMA Football 2025-ah vawiin hian round of 32 khelh chhunzawm a ni dawn. Chawhma dar 10:00 hian RG Stadium-ah Lalbiaksanga Colney enkawl Bethlehem Vengthlang leh 2004 champion Ramthar te an inkhel dawn a, BVT an ṭha zawk.

Vaivakawnin harsa taka Khawilailung an hneh hnuah team nem zawk Bethlehem an hmachhawn dawn. Vawi thum champion tawh Electric Vengin Kawnpui Vengthar an hmachhawn dawn a, Kawnpui hian MPL best player pawh ni tawh H. Lalbiakthanga leh Aizawl FC keeper Vanlalhriatpuia te an kawl.

1st Bn MAP Ground, Armed Veng-a match tawp berah Salem Veng leh College Veng te an inkhel dawn a, an inkhel tawk khawp ang. Salem Veng hi seeded an ni a, College Veng hian Zothanmawia (T. Mawia) an kawl. Chanmari FC goalkeeper hi veng tan chuan defender rinrawl a ni thung.

Mak takin Lawipu leh Leitan Ramthar ten last 32 an thleng pha a, an intum tawk viau turah a ngaih theih. Chanmari West leh Sialhawk te pawh inkhel tawk viau tura ngaih an ni a, chutihrualin R. Laldanmawia telna Sialhawk hi an buk a rit hret. Match tawp berah Zobawk Vengthar leh Serchhip Vengchung te an inkhel dawn a, Lunglei lam team hi Armed Veng hnehtu an nih avangin chak tura rin zawk an ni.