De Bruyne hi Messi dawttu - Pep

Manchester City manager Pep Guardiola chuan Kevin de Bruyne chu player a enkawl tawh zinga ball pass thiam pahnihna a nih thu a sawi - a chungah Lionel Messi a dah.

KDB tan Messi tluk loh a zahthlak loh a, Pep-a'n ball pass thiam bik Andres Iniesta, Xavi leh David Silva te a lo enkawl tawh tih ngaihtuah phei chuan chawimawina ropui a ni.

Pep chuan, "KDB hi ka enkawl tawh zinga ball pet thiam bik top three-ah a tel. Pakhatna chu Messi a ni a, Kevin hi pahnihnaah ka dah. Messi hi chu ka hmuh tawh a zawnga thiam ber lawr lak a ni a, goal bulah a tal tam a, Kevin pawh chutiang chu a ni.

"Kevin hian goal leh assist a ngah em em a, tlarhmaa team a puih dan lah kan hria. Manchester City-in player a neih tawh zinga a ṭha ber pawl a ni a, player danglam tak a nih avangin fak hi a phu a ni," a ti.

KDB hian Pep-a hnuaiah league match 258 khelin, minute 90 dana 0.5 assist nei zel ang leh, 3.6 chance siam zel ang a ni a, league bikah chuan Messi, Xavi, Iniesta leh Silva te statistics aiin a ṭha zawk.

City tana nomawi 16 ngawt latu KDB hian season tawpah City hi a chhuahsan dawn a, City hian amah thlak turin Bayer Leverkusen midfielder Florian Wirtz beisei zet mah se, sum sen tur a tam avangin an inhnukdawk.

Tun season-a nomawi chawi lo tur City hi nizan khan Bournemouth nen an inkhel a, result kan hre hman lo. KDB tan Etihad Stadium-a a match hnuhnung ber a ni nghal ang.