Di Maria-a'n Benfica chhuahsan dawn

Argentine forward Angel Di Maria chuan season tawp rualin Benfica a chhuahsan dawn tih a tichiang ta a, kum 37 mi forward hian a contract zo mai tur chu a ziak thar dawn lo tihna a ni.

Di Maria hian Benfica aṭangin European football a hmelhriat ṭan a, 2007-10 season inkar kha a lo khel tawh. A hnuah Real Madrid, Manchester United, Paris Saint-Germain leh Juventus tan a khel a, a vawi hnih nan 2023 khan Benfica hi a zawm.

Season hmasa khan match 48-ah goal 17 khungin, assist vawi 15 a nei a, Supertaca Candido de Oliveira nomawi an chawi. Tun season-ah match 39 khela goal 15 khungin, Taca da Liga-ah an champion.

Primeira Liga-ah an champion teuh viau a, mahse, match tawp berah SC Braga chu 1-1 a an inhnehtawkpui laiin, an elpui Sporting Lisbon chuan 2-0 in Vitoria SC an hneh thung a, point hniha Sporting hi phak loin, Ruben Amorim-a chhuahsan tak club hi an champion.

Di Maria chuan, "Hetianga season kan khar ta mai hi na ka ti takzet a, league-ah chuan Benfica jersey ka hak hnuhnun ber tur a ni tawh dawn a ni. Final pakhat kan la bak a, hnehna chan ngei beisei chungin khelmual kan lut ang," a ti.

May 25, Pathianni zanah Taca de Portugal final khelh a ni dawn a, Benfica hian Sporting Lisbon an hmachhawn dawn - an chak chuan nomawi pahnih nen season an khar thei dawn tho tihna a ni a, Di Maria-a'n champion ngei a duh dawn.

Benfica hi June-a khelh tur FIFA Club World Cup-ah an inlan dawn a, Boca Juniors, Auckland City leh Bayern Munich te nen group khatah an awm ho a, Di Maria hi a inlan ang em, engmah sawi chian a la awm lo.