Ajax coach Farioli a bang

Dutch club hlun Ajax coach Francesco Farioli chuan uiawm taka nomawi an chawi loh hnuah a team hi a chhuahsan thu a puang a, kum 36 mi manager chuan club hotute nen an thu a inhmuh loh avanga bang a nih thu a sawi.

Farioli chuan, "Club thuneitute nen Ajax tana kan thil tum chu a inang ngei a, mahse, kan duhnate tihlawhtling tura hun kan mamawh zat leh hnathawh dan turah kan inrem thei lo a ni," a ti a, a tan chhuah hun ṭha ber nia a hriat thu a sawi bawk.

Ajax hian 2021-22 season hnuah league nomawi an chawi leh tawh lo a, tun season-ah an tifuh teuh hle. March 30 khan pahnihna PSV Eindhoven chu 2-0 a hnehin, point kuain an sang fal.

Match sarih chiah khelh tur a awm tawh avangin PSV captain Luuk de Jong chuan, "Point kuaa inthlauh chu a tam lutuk a, match tlemte chauh khelh tur awm tawhah chuan a harsa tawh. UCL khelh phak kan tum ang," tiin a sawi hial.

Mahse, Ajax hian a hnua match sarih an khelhah vawi thum chiah hnehna an chang a, vawi hnih draw neiin, vawi hnih an tlawm. PSV erawh an chak vek a, point khatin an champion ta daih!

Ajax technical director Alex Kroes chuan an coach Farioli an chân chu pawi a tih thu sawiin, UCL khelh phak an tumna an tihlawhtling tho tih a sawi a, "Ajax-ah chuan a ṭha thei ang bera khelh zel kan duh a, chu chu Francesco hian min tihhlawhtlinpui a, a chungah kan lawm takzet," a ti.

Liverpool captain hlui Jordan Henderson chu Ajax-ah hian captain niin, Netherlands international Wout Weghorst leh Aston Villa winger hlui Bertrand Traoré te nen an khel ho.