Zaninah IPL Playoff khel tur zawnna Mumbai Vs Delhi

Indian Premier League-ah playoff khel tur hmun ruak pakhat chiah a awm tawh a, playoff beiseina nei pahnih Mumbai Indians leh Delhi Capitals te zanin dar 7:30 hian Wankhede Stadium-ah an inkhel dawn. Mualneitu Mumbai hian hnehna an chang a nih chuan playoff khel turin an tling dawn a, Delhi an chak thung erawh chuan Capitals tan playoff khel turin match hnuhnung bera Punjab Kings hneh a tawk ang.

Gujarat Titans, Royal Challengers Bengaluru leh Punjab Kings ten playoff an lut tawh a, playoff hi qualifier 1, eliminator leh qualifier 2-ah ṭhen hran a ni. Qualifier 1-ah hian pakhatna leh pahnihna te May 29, Ningani zanah an inkhel ang a, a chak zawkin final an lut nghal dawn. May 30, Zirtawpni zanah pathumna leh palina an inkhel leh ang a, heta chak zawk leh qualifier 1-a chak lo zawkten June 1, Pathianni zanah qualifier 2 an khel dawn. Final hi June 3, Thawhlehni zana khelh tura ruahman a ni.

Thawhṭanni zan khan beisei tur nei tawh lo Lucknow Super Giants (205/7) leh Sunrisers Hyderabad (206/4) te an inkhel a, wicket rukin SRH an chak. Sunrisers tan Abishek Sharma chuan ball 20-ah 59 runs a siam a, hnehna an chan nan a pawimawh hle.