Liverpool-in chak dan an theihnghilh!

Premier League champion Liverpool-in an champion tih a chian hnuah chak an la nei lo - Tottenham Hotspur laka 5-1 a champion an nemngheh hnuah khan Reds hian league match thum an khel a, point khat chiah an hlawh chhuak!

Arne Slot naute hian Chelsea (3-1) an ngam loh hnuah Arsenal (2-2) an inhnehtawkpui a, Thawhṭanni zan khan Brighton & Hove Albion chu khualmualah 3-2 in an ngam lo leh ta.

Liverpool hian Harvey Elliott hmangin hma takah goal hmahruai khung mah se, Brighton-in Yasin Ayari hmangin si phurh an sut a, Reds-in Dominik Szoboszlai hmanga hma an hruai nawnna chu Kaoru Mitoma leh Jack Hinshelwood hmangin an chhanglet leh bawk a, 3-2 in an chak daih.

Inenchhinna!

Liverpool boss Arne Slot-a'n an champion hnu khan, league match hmabak la awm chu inenchhin nan a hman tur thu a sawi a, season thar atana inpuahchahna a nih tur thu a sawi. Brighton lakah pawh chhuak tur Trent Alexander-Arnold chu bench-ah a ṭhu tluan a, captain Virgil van Dijk pawh bench lamah a awm tluan.

August-a Juventus aṭanga lakluh Federico Chiesa chuan a vawi khat nan Premier League match-ah bul a ṭan a, mahse, goal khungtu erawh bul ṭan khat tak ve tho Harvey Elliot niin, minute kuanaah goal hmahruai a khung.

Mahse, league khelh laklawh laia Dubai lama chawlh hmang Liverpool tha a tho tawk lo. Minute 32-naah Yasin Ayari chuan si phurh a sut. Mahse, Reds tan Szoboszlai inlar ve lehin, chawlhlawk hmain goal a khung a, 2-1 a ni.

An tlawm

Brighton hian tawnhriat nei ṭha Danny Welbeck hmangin khung belhna remchang nei mah se, goalkeeper Alisson chuan ṭha zetin a dansak a, Kaoru Mitoma-a si phurh sutna goal erawh a dang thei lo.

Hun tawp nan minute nga chiah a awm tawh tihah Hinshelwood chuan a khung ve leh bawk a, Liverpool an tho tawh lo - a vawi khat nana Premier League match-a captain armband hrengtu Mohamed Salah pawhin goal a khung thei lo.

EPL-a a match 300-na kheltu Salah hian tun season-ah league match 37 khelin goal 28 a khung a, assist 18 a nei. EPL season khata goal thawk chhuak hnem ber, Alan Shearer leh Andrew Cole (47) te goal thawhchhuah zat thawk chhuak turin, goal khat emaw assist khat a la bak - match khat chauh a awm tawh a, an record a phak lohte erawh EPL season khata match 42 an khelh lai a ni.