A thiam 32 zingah Durtlang

LBS Suzuki 22nd Inter Branch YMA Football Tournament-ah round of 32 lut a hriat kim ta a, nimin khan football thiam khua Durtlang leh Chawnpui ten an khingpui ve ve hnehin, a thiam 32 zingah an hming an ziak kai ve leh ta.

Chite Veng Playground-ah Durtlang-in Ainawn Veng chu 3-1 in an hneh a, ISL player kawl hnem pawl Durtlang hi Ainawn tan chuan an u hret tih loh rual a ni lo.

Durtlang tan Lalliansanga'n minute 14-na lekah goal hmahruai a khung a, mahse, inkhel thunun chungin Durtlang hian goal an khung belh lawk lo - second half-ah East Bengal defender Lalchungnunga leh Sudeva academy-a inzir mek Lalvohbika ten goal khat ve ve an khung a, 3-0 in hma an hruai.

Champion tum Durtlang hi nuamsa taka chak tur angin an lang hman a, mahse, an hri vei an sim thei lo - minute 83-naah goal an chhuah leh hram a, Chanmari FC winger Lalthankima (Thathana) chuan Ainawn mualpho khuhna goal a khung.

East Bengal defender Chungnunga, Mumbai City full back Hmingthanmawia Ralte (Valpuia), Hyderabad midfielder Isaac Vanmalsawma leh tawnhriat nei ṭha Ricky Lallawmawma te kawltu Durtlang hian champion nomawi hawn an tum chuan round of 32 aṭangin goal chhuah loh an zir ṭan a ṭul ang.

Third round inkhel hnuhnung berah nimin khan Chawnpuiin hnehna chang turin harsatna an tawk lo. Mizoram Premier League thlenga club lo nei thei tawh veng hian Kanhmun chu 6-1 in an sawp.

Chawnpui tan David Laltlangsanga'n minute lina lekah goal hmahruai khungin, Kanhmun tan PC Malsawmtluanga'n minute 12-naah sut mah se, a bak zawng chu Chawnpui chanpual a ni tawh.

Amosa Vanlalruata'n hming chher hun a ni tih hriain hattrick a rawn siam a, PC Lalruatsanga leh Ephraim Vanlalduhsaka ten goal khat ve ve khung bawkin, 6-1 in Chawnpui an chak a, round of 32 an lut.