Last 16-a en châkawm ber Khawzawl Vengthar Vs Republic Veng

LBS Suzuki CYMA Football last 16-ah vawiin chhun dar 12:15 hian Khawzawl Vengthar leh Republic Veng te an inkhel dawn. Kawnpui Vengthar hi Lengpui leh Chhinga Veng hnehtu an ni a, Republic Veng hi Mizo coach ṭha Lalsangzuala Hmar enkawl an ni thung.

Khawzawl Vengthar hi inelna hmachhawn tam an ni a, Khawzawl chhung inelnaah chuan nomawi an chawi reng. Mizoram pawn inelnaah pawh Khawzawl Vengthar hi Mizoram ai awhin an feh chhuak a, I Day Football (Sikkim) ah vawi hnih ngawt an champion. Tawnhriat an neih ṭhat avangin inrintawkna pawh an ngah hle.

Khawzawl Vengthar hian Hlimen 4-0 in an hneh a, ngaihven an hlawh ṭan tak takna erawh champion rinkai zinga mi Lengpui an hneh theih vang a ni. Lengpui lakah F. Lalchhanchhuaha hoin tlarhnung an rem phui ṭha a, F-a hi Chhinga Veng 3-2 a an hneh ṭum pawhin a che ṭha a, chakna goal a khung.

Group G hi group of death a nih avangin Khawzawl Vengthar kalkawng a hautak a, last 16-a an khingpui tur pawh Republic Veng an ni. CYMA Football 2005 champion hian Khawzawl Zuchhip 5-0 in an hneh a, Khawzawl team ṭha zawk lakah fiahin an awm dawn.

Republic Veng hian Zemabawk East (16-0), Chanmari (2-0), Samlukhai (6-0) leh Zuchhip (5-0) te hneh tawhin goal 29 an khung tawh a, goal an la chhuah lo. Player naupang leh upa ber inthlauhna hi kum 23 a ni a, coach Sanga'n player kum inthlau tak tak hi inkawp rem takin a rem khawm a, tun inelnaa team hmuhnawm zinga mi an ni.

Inkhelhna hmun tur hi RG Stadium a nih avangin Republic Vengin ṭantu an nei ṭha dawn a, khelmualah team pahnih an intluk tawk a nih pawhin khelmual pawn lamah Republic Veng an ṭha zawk ang.