India U23 squad-ah Remtluanga leh Terina

All India Football Federation chuan May 20, Thawhlehni khan India U23 enkawl turin NorthEast United coaching staff zinga mi Naushad Moosa chu an ruat a, nimin khan Moosa hian player 29 awmna probable squad a ko nghal. India aiawha koh zingah Mizo tlangval pahnih Lalrinliana Hnamte (Terina) leh Lalremtluanga Fanai te an tel.

Chanmari tlangval Terina hi East Bengal leh Mohun Bagan tan a khel tawh ṭhin a, season liam ta khan Chennaiyin tan khelin ISL-ah match 22-ah a inlan a, goal leh asssist vawi khat ve ve a nei.

Remtluanga Fanai hi COE Academy chhuak a ni a, Bengaluru FC-ah intat hriamin, season liam ta khan BFC tan hian match 26-ah an inlan. Bawngkawn tlangval hi CYMA Football-ah an veng tan a inlan a; May 26, Inrinni hian last 16-ah Leitan Ramthar nen an inhmachhawn ang.

India U23 hi June 18 leh June 21 hian Tajikistan U23 leh Kyrgyz Republic U23 te nen an inkhel dawn a, June 1 aṭangin Kolkata-ah training an ṭan ang. AIFF hian Under 23 team hi senior team tur chher hriamna atana din a ni.