Clay-ah Djokovic a chak

French Open inbuatsaih nan Novak Djokovic chuan Geneva Open a khel a, coach nei loa khel ni mah se a match hmasa berah Marton Fucsovics chu straight set hmangin a hneh nghal.

Grand Slam vawi 24 champion tawh Djokovic hian vawiinah kum 38 a tling ta chiah, a dam ṭhat chuan player hlauhawm a la ni reng thung. Nilaini zan inkhelah pawh Hungarian tlangval hi 6-2, 6-3 in a la hneh thei a ni.

Thla hmasa khan Djokovic hian Madrid Masters a khel a, hneh nei loin a tla nghal. Tunah erawh insiamṭhain chak ni hmel a hmu leh ta a, clay court inelna lian ber an khelh hma ngeiin a khelh dan phung pangngai neih let hman a tum ang.

Inkhel dangah Taylor Fritz pawh a chak - American tlangval hi seeded pakhatna pek a ni, a khingpui Quentin Halys chu 6-4, 7-6 (7/5) in a hneh a, a thiam zual pariat zingah a inhlangkai.

French Open inbuatsaihna tournament dang Hamburg Open pawh khelh mek a ni a, champion tura rinkai Alexander Zverev chu Alexandre Muller hneh loin last 16-ah a zinkawng a tawp.

World number 3 Zverev tan world number 40 Muller hi khingpui harsa lutuk tur niin a lang lo, mahse rinkai loh ni zawk chungin Muller chu 6-3, 4-6, 7-6 (7/5) in a chak a, world number 5 chin a hneh vawi khatna a ni hial.

Clay court inelna lian ber French Open hi May aṭangin main draw khelh ṭan a ni dawn, tun kar hian qualifier khelh niin, main draw tling sate erawh chuan inbuatsaih nan tournament dang an khel thung a ni.