Pacers an chak hmasa phawt

Dinhmun hniama an din hnuah Indiana Pacers chuan nimin zing khan New York Knicks 138-135 in an hneh. NBA Eastern Conference finals khelh mekah, best of seven series hmanga chak zawk zawn tur niin Pacers hian 1-0 in hma an hruai.

Madison Square Garden-ah Knicks an che fuh hmasa zawk a, hun tawp hma minute hnih leh second 51 la awm laiin point 14 ngawtin an sang zawk. Mahse, Indiana lamin mak tak maiin 3-points vawi ruk ngawt an vawm lut, heng zinga panga chu Aaron Nesmith-a neih a ni hial.

Hun pangngaiah an inhnehtawk chho a, overtime khelh niin Pacers lamin point 13 an hmuh belh laiin Knicks lamin point 10 bak an hmuh belh ve lo thung a, an phu ang ngeiin Pacers an chak.

May 24, Inrinni zing dar 5:30-ah game 2 an khel leh dawn, conference champion ni tur chuan a tlem berah vawi li tal chak a ngai a, game 1-a chak lo Knicks tan insiamṭhatna hun a la awm.

Basketball inelna ngaihhlut berah hian - Eastern Conference leh Western Conference an awm hrang a, conference champion pahnihte hian NBA Finals an khel zui leh dawn a ni.