Pacquiao a lo kir dawn!

Kum li zet boxing ring chhunga a luh tawh loh hnuah Manny Pacquiao chuan boxing a kalsan tak tak thei lo a, ring chhungah a lo kir leh dawn - kum 46 mi ni tawh mah se, a tha a la za reng a ni mahna!

Filipino boxer lar hian WBC welterweight champion Mario Barrios chu July 19 khian Las Vegas-ah a hmachhawn dawn a, welterweight world champion upa ber record a chelh lai chu belhchhah a duh.

Pacquiao chuan, "Ka lo kir leh ta e, thawnthu thar chu i ziak leh ang hmiang," tiin a lo kir tur thu hi a puang a, kum 2019 khan Keith Thurman chu kum 40 mi nia hnehin, WBA (Super) world title a lo hlawh chhuak tawh.

Kar hmasa lawk khan WBC chuan ranking thar ber ti chhuakin, Pacquiao hi number 5-ah an dah a, tunah chuan a lo kir dawn tih a chiang ta. WBC president Mauricio Suliman chuan, "Pacquiao hi Nevada chuan inhnek phalna an pe tawh a, medical a paltlang vek bawk.

"Heng avang hian WBC champion ropui lo ni tawh ṭhin hi kan organisation chuan fight hmachhawn turin phalna kan pe ta a ni," a ti - August 2021 kha Pacquiao inhnek hnuhnun ber niin, Yordenis Ugas chu unanimous decision (115-113, 116-112 & 116-112) in a ngam lo.

Vawi li ngawt welterweight champion lo ni tawh Pacman hian fight vawi 62 hmachhawn tawhin, vawi riat a tlawm a, vawi hnih draw a nei. Boxing a chawlhsan hnuah politics lamah a insawrbing a, mahse, kar hmasa lawk khan Philippines senate atana inthlan a hmachhawnah a chak lo a ni.