Kan thiam vangin kan champion - Slot
Liverpool boss Arne Slot chuan Premier League-ah an thiam vanga champion an nih thu a sawi a, Dutch coach chuan, "Hetiang taka season reiah chuan a thiam ber an champion mai ṭhin," a ti a, vanneih vang maia nomawi chawi tur an nih loh thu a sawi.
Reds hian April 27 zan khan Tottenham Hotspur chu 5-1 a sawpin, EPL an champion fel der a, an champion hian match li bak khelh tur a awm tawh lo. Spurs an hneh ṭum hian champion turin point khat bak an mamawh lo a, point 80 lekin an champion thei tihna a ni.
Hemi chungchangah hian pahnihna Arsenal boss Mikel Arteta chuan vanneih a ngaih tel thu a sawi a, tun hnai season hnihah point 89 leh 84 hmu chunga an champion loh thu a sawi lang.
Slot chuan, "Tu pawhin ngaihdan chu an nei thiang a, Arteta pawh hian, 'A chang chuan a hun takah, a hmun takah awm a ngai a ni,' tia a sawina maiah kei chuan ka ngai a, ka pawmpui thlap.
"Mahse, EPL-ah chauh ni loin, Champions League, FA Cup leh World Cup-ah te pawh chutiang chu a ngai vek a ni. Hetiang taka season reiah chuan a thiam ber an champioin mai ṭhin," a ti.
Liverpool hian Pathianni zan dar 8:30-ah FA Cup champion Crystal Palace an mikhual dawn a, inkhelh zawhah EPL nomawi hlan an ni ang a, Thawhṭanniah Liverpool kawtthlerah champion an lawm ang.
Slot chuan a thlak tak Jurgen Klopp-a sulhnu chhui chungchang sawi zuiin, "Reds hian nomawi chawi tur ringawtin min la lut lo a, ka khelh dan system an duh vang a ni tel a, chu chuan inrintawkna min pe nasa hle. Chu mai a ni lo - Klopp khan hmun duhawm taka dah chungin Liverpool a chhuahsan a ni," a ti.
Feyenoord tana league nomawi lo chawi tawhtu Slot chuan, "He team kalphung, an thawhrim dante hmuh hian, club zawm nuam tak a ni. A tir aṭangin discipline chungchang hi a hranpaa kalpui a ngai lo. An thawkrim em em a, an quality a sang hle bawk.
"Ni tina an thawhrim dan hmu tan chuan nomawi kan chawi ngei kha beisei loh chi a ni lo a, thil ṭhenkhat hote thlak danglam bak kha tih tur a awm lo," a ti a, an hlawhtlinnaah midang a fak mawi thiam hle.