LBS Suzuki CYMA Football 2025: Vawiinah quarterfinal lut tur a hriat kim dawn

LBS Suzuki 22nd Inter Branch YMA Football 2025 chu vawiin hian RG Stadium-ah khelh chhunzawm a ni dawn a, last 16 khelh zawh a ni ang. Chawhma dar 10:00-ah Bawngkawn leh Leitan Ramthar an inkhel dawn a, chhun dar 12:15-ah Sialhawk leh Serchhip Vengchungin a chhunzawm dawn. Chawhnu dar 2:30-ah Chawnpui leh Durtlang ten an tawp a khar ang.

Inkhel hi Zonet Rihnim leh YouTube channel-ah pek chhuah a ni a, a hmuna inkhel en man hi Rs 50 a ni. CYMA Football hi veng/khua inelna a nih avangin entu an ṭhahnem ṭhin a, boruak pawh a sang ṭhin hle.

Hei le, Bawngkawn

Football thiam veng Bawngkawnin tun ṭum inelnaah an veng chhung inkhelh thiam an khawm ṭha a, champion rinkai ni phak lo mah se team ṭha zinga mi an ni. Bawngkawn hian Kawnpui Bangla Veng (3-0), Darlung (8-0) leh Reiek (3-2) te an hneh tawh a, MS Dawngliana (Dawngtea) chu an goal khung khawl a ni.

Bawngkawn hian Bengaluru FC midfielder F. Lalremtluanga an kawl a, round of 32-a Reiek laka an talbuai deuh ṭumah pawh Remtluanga hi bench aṭanga lutin goal hnih a khung. An khingpui tur Leitan Ramthar tan erawh an thlen chin apiang thil thar a ni chho zel a, Bawngkawn laka hnehna chang tur chuan tlarhnung rem phui ṭhat a ṭul ang.

Leitan Ramthar hian Tuivamit, Muallungthu leh Lawipu te an hneh tawh a, penalty shootout vekin an chak. Vawiinah pawh Bawngkawn hi minute 90 chhung chelh an tum dawn a ni.

Sialhawk Vs Serchhip Vengchung

2022 Inter Village Football-ah Sialhawkin final an lut avangin an thawm a ring a, veng/khua inelnaah pawh team naran chunglam an ni zel. Tun ṭum inelnaah pawh Sialhawkin last 16 an thleng a, Aizawl FC player hlui R. Laldanmawia chu an player pawimawh a la ni reng.

Sialhawk khingpui tur Serchhip Vengchung hi vawi nga champion tawh Armed Veng hnehtu an ni a, Mizoram aiawh pawha khel tawh Johny Lalrinchhana telna a ni. Aizawl khaw pawn team pahnih hi an intluk tawk viau turah a ngaih theih.

Durtlang dal theitu Chawnpui

Durtlang hi inelna ṭan hmaa thawm nei lian an ni a, match thum an khelh hnuah pawh champion rinkai zinga mi an la ni reng. Coach Malsawmdawngliana kaihruai Durtlang hian Mamit Hmar Veng (2-1), Ainawn Veng (3-1) leh Muthi (4-1) te an hneh tawh.

Mak ang reng tak erawh defender ṭha rual awm khawmna Durtlang hian clean sheet an nei lo a, Chawnpui lakah chesual thei an ni. Chawnpui hian Melriat 4-2 a hnehin bul an ṭan a, Kanhmun 6-1 a hneh lehin match hnuhnung berah Kulikawn West 4-1 in an sawp leh bawk. Chawnpui hian goal 14 an khung tawh a, Durtlang lakah pawh chak an inbeisei ngam ang.