Republic Vengin team ṭha Khawzawl Vengthar an hneh

24th May, 2025

LBS Suzuki 22nd Inter Branch YMA Football 2025-ah group of death aṭangin Republic Veng an tal chhuak a, Lalsangzuala Hmar hote hian nimin khan Khawzawl Vengthar 1-0 in an hneh. RG Stadium inkhel hmuhnawm takah F. Lalrinpuia'n (Valpuia) goal awmchhun a khung.

Republic Veng hian May 27, Thawhlehniah quarterfinal an khel dawn a, vawiina Sialhawk leh Serchhip Vengchung inkhela chak zawk an hmachhawn ang.

An fimkhur ve ve

Khawzawl Vengtharin team ṭha Lengpui leh Chhinga Veng te an hneh tawh a, inrintawkna an nei lian tawh. Match pawimawh pahnih hi RG Stadium-ah ve ve an khelh bawk avangin khelmual an hrechiang tih ṭan phat aṭangin a lang.

Republic Vengin Zemabawk East, Chanmari, Samlukhai leh Khawzawl Zuchhip te an hneh tawh a, match li ngawt khel tawh mah se RG Stadium-ah khel loin Chite Veng Playground leh 1st Bn MAP Ground-ah an khel thung.

Team pahnih an fimkhur a, Khawzawl lamin khelmual zauhna an hmang thiam zawk. Chutihrualin first half-ah chance hmuh tur a awm meuh lo a, chungnung zawk pawh an awm lo.

Valpuia a la rintlak

Coach Sanga'n halftime laiin substitution awmze nei a siam a, Aizawl FC defender hlui Lalmuanawma (Munez) luhtirin tlarhma lam a siksawi a, F. Lalrinpuia chu hmatawng hmasa berah a awm tawh. Valpuia hian minute 51-naah Khawzawl Vengthar defender ball chhuhsakin goal lamah a la nghal a, goalkeeper rawn chhuak hmuin awlsam hmel takin a khung.

Goal a luh tak avangin Khawzawl Vengthar an fimkhur reng thei lo a, team pahnih an innawr tawn zak zak. Joseph Vanlalhriatrenga chu Republic Veng tlarhnung tan a hnawksak a, man of the match-a thlan RS Lallawmzuala'n Joseph-a goal khung tur a dang ṭha hle.

Republic Vengin goal dang khung belh theihna remchang an nei a, Valpuia'n crossbar a tauh per bakah a cross ṭha zet chu Lalfakzuaka'n hnai tak aṭangin a tauh over a, goal dang an khung belh theih loh avangin a tawp thlengin an buai phah. Khawzawl player V. Lalhriatrenga'n hnai tak aṭangin a vai ṭhelh a, an chance neih ang dangte erawh keeper RS Lawma'n a dang vek. Inkhela chungnung hret Republic Veng 1-0 in an chak.