Quarterfinal-ah Kawnpui veng pahnih

Mizoram pum veng/khua inelnaah team 154 an chhuak a, a ṭha pariat zingah Kawnpui veng pahnih an tel. Kawnpui Venglaiin Zirtawpni khan Tlangpui hnehin quarterfinal an lut a, nimin khan Kawnpui Vengtharin College Veng hnehin a thiam pariat zingah an inhlangkai ve bawk.

Nimin inkhelah Kawnpui Vengtharin bul an ṭan ṭha a, minute kuana lekah mawi zetin College Veng tlarhnung an ṭhiat a, Lalrinhlua'n cool zetin a hmawr a bawk. Kawnpui Vengthar an che ṭha chhunzawm a, minute 26-naah box pawn aṭangin MPL10 best player H. Lalbiakthanga'n box pawn aṭangin kawh zetin a pet goal.

Goal hnih an chhuah hnuah College Veng an insiamṭha hret a, mahse Kawnpui Vengthar tlarhnungah Vanlalhriatpuia leh a hote an ding khawng tlat. Kawnpui hian Aizawl FC goalkeeper pahnih an kawl a, Vanlalhruaia chu goal ven tirin Hriatpuia hi tlarhnungah an dah a, man of the match-ah thlan a ni hial.

Kawnpui Vengtharin chak phu mah se talbuai ve thei tho an ni a, College Veng forward Lalpekhlua'n second half-ah penalty a hlah a, crossbar per loin goal len tawn puar ngat se hun tawp lam inkhel a hmuhnawm phah ngei ang.