Bethlehem derby-ah BVT an chungnung

LBS Suzuki 22nd Inter Branch YMA Football 2025-ah Bethlehem derby hmuh tur a awm a, entu pawh a ṭhahnem. Football ngaina veng pahnih inkhelah Bethlehem Vengthlang an chungnung zawk a, 6-1 in an chak.

Lalbiaksanga Colney kaihhruai BVT tan Lalrammawia leh K. Lalramzauva ten goal hnih ve ve an khung a, K. Lalmalsawma leh Lalruatkima ten goal khat ve ve an khung bawk. BVT hian quarterfinal-ah Bawngkawn leh Leitan Ramthar inkhela chak zawk an hmachhawn ang.

Bethlehemin BVT ngam lo deuh mah se an ṭantute tan auna tur an siam sak tho a, minute 67-naah Zomuanthanga'n a khung. Tun inelnaa an thlen chinah Bethlehem an lawm ang.