Barca-ah Flick a cham dawn

La Liga, Copa del rey leh Supercopa de Espana-a Barcelona champion puitu Hansi Flick chu Barcelona-ah a cham chhunzawm dawn a, German coach hian June 2027 thleng Catalan club-ah hian hun a hmang ang.

Flick hian May 2024 khan Barcelona hi a zawm a, kum hnih atan contract a ziak. Flick hian Barca-ah hian chhiah pek ngaite a pek vek hnuah, kum khatah euro maktaduai 3.5 vel a hlawh nia sawi a ni a, khawvel coach langsarte hlawh aṭanga teh chuan a tam lo hle.

Hetihrual hian Flick-a contract-ah hian bonus neuh neuh a awm nual a, Champions League nomawi an chawi chuan €1mtd dawn theihna leh, La Liga champion-a €8,92,098 dawn theihnate a tel.

Flick-a'n contract thar a ziah hian a hlawh pawh a pung nual tura ngaih a ni. Barcelona chuan, "Hansi Flick hian a season khatnaah team inrintawkna, comeback ropui tak leh nomawi duhawm tak tak min hmuhtir a, fan-te hlimna a thlen nasa hle," an ti.

Catalan club hian, "A season hmasa bera a hnathawh avangin Europe-a team hlauhawm ber pawlah Barca chu a siam leh ta a ni," an ti bawk a, Flick an chelh thei chu an hlim hle.

Flick hian Bayern Munich chu kum 2020 khan treble champion a lo nihpui tawh a, a hnuah Germany enkawl turin a chhuahsan. Mahse, German national team-ah a hlawhchham a, September khan ban a ni.

May 2024-ah Barca legend Xavi thlakin Catalan club a enkawl zui a, Spanish champion chuan, "Hansi Flick hian Barcelona-ah thawnthu duhawm tak min hlui a, season lo awm zel turah pawh a belhchhah kan beisei," an ti a, beiseina an nei sang hle.

La Liga champion Barcelona hian May 25, Pathianni zan dar 12:30-ah Athletic Bilbao lenchilhin, tun season-a an league match hnuhnung ber tur a ni tawh dawn.

Spanish top flight league-ah hian champion bakah Champions League khel tur pawh a chiang tawh a, top five chinin UCL an khel dawn. Barca bakah Real Madrid, Atletico Madrid, Athletic Bilbao leh Villarreal chu UCL khel tur an ni.

Europa League khel turin Real Betis an tling chiang tawh a, Celta Vigo, Rayo Vallecano leh Osasuna zinga pakhatin Europa League hmun ruak pakhat an hnawh khat leh bawk ang.

Las Palmas leh Real Valladolid pawh league hniam lamah an relegate tawh a, pakhat la relegate leh tur niin, Espanyol emaw Leganes an tla ve leh dawn a ni.