Thunder thawm a na chhunzawm

Oklahoma City Thunder chuan nimin zing khan Minnesota Timberwolves chu 118-103 in an hneh a, Western Conference finals khelh laia best of seven series chu 2-0 in an thunun mek - conference champion ni turin vawi li tal chak a ngai thung.

Thunder tan hian Shai Gilgeous-Alexander chu player hmuhnawm leh ṭangkai a ni leh a, NBA Most Valuable Player of the season hian point 38 ngawt neiin an chak theih nan a thawh hlawk takzet.

Game 1 an khelh ṭum pawhin Gilgeous-Alexander hian point 31 a lo nei tawh a, game 2-ah hian point a hmuh tam bakah a ṭhiante basket neih tur vawi riat siamsakin rebound vawi thum a la bawk.

Oklahoma point guard Alex Caruso chuan, "A tir lamah inkhel thununin hma kan hruai thei a, kan hma hruaina chu kan vawng tluan thei bawk, game hmasa pahnih kan khelh ang bawk hian game 3 pawh khelh kan tum ang," a ti.

May 25, Pathianni zing dar 6:00 hian Target Center-ah game 3 khelh a ni leh dawn a, an inkhelhna hmun tur a danglam tawh dawn avangin Timberwolves pawhin beiseina an nei thar thei ang.

Timberwolves head coach Chris Finch chuan, "Game thar apiang hi kan tan chuan hun ṭha a ni dawn a, tunah chuan keimahni khelmualah result ṭha neih ngei tumin kan bei dawn a ni," tiin a sawi.