Modric-a'n Real chhuahsan dawn

Real Madrid legend Luka Modric chuan FIFA Club World Cup khelh zawh rualin Santiago Bernabeu a chhuahsan dawn tih a chiang ta a, zanin dar 7:45-a Real Sociedad an mikhual tur chu Real tana a league match hnuhnung ber tur a ni ang.

Kum 39 mi Modric chuan, "A hun a thleng ve ta. He hun hi thleng thei miah lo se, tih hi ka duhthusam a ni a, mahse, hei hi football chu a ni si. Hringnunah hian engkim hian a bul ṭan hun leh tawp hun a neih a ngai a ni," a ti.

Modric hian kum 2012 khan Tottenham Hotspur aṭangin Real Madrid hi a zawm a, nomawi 28 zet chawipuiin, heng zingah hian Champions League nomawi paruk leh La Liga title pali a tel.

Real tan match 590 khel a, goal 43 leh assist 95 neitu Modric chuan, "Kum 2012 khan khawvela team ṭha ber jersey ha a, thil ropui tak tih tumin he hmun hi ka lo pan a, ka beisei aia sang ka tawng a ni.

"Real hian footballer ka nihna piahlamah ka nun min thlaksak a, football khawvela club ropui berin a hun tawn hlimawm ber pawl ka tem phak kha ka vannei hle a ni," tiin Real thlahna thu a sawi.

Madrid khaw club hian June 18-ah Saudi Arabia club Al Hilal hmachhawnin, Club World Cup-a an match hmasa ber an khel ang a, Mexican club ṭha Pachuca leh Austrian club RB Salzburg te chu group stage-ah an hmachhawn bawk ang.

La Liga-a Real tana Modric-a match hnuhnung ber hi Brazil enkawl tur Carlo Ancelotti tan Real a kaihhruai hnunung ber a ni dawn bawk a, Bayer Leverkusen boss Xabi Alonso chuan CWC-ah chuan Real hi a kaihruai tawhin a rinawm.