Flamengo-in Jorginho an duh

Brazilian club Flamengo chuan Arsenal aṭangin midfielder Jorginho lakluh an tum a, Italy international hi Club World Cup hmaa neih an duh avangin Gunners nen an indawr mek.

Kum 33 mi Jorginho hian June-ah Arsenal-a a contract neih lai chu a hmang zo tawh dawn a, free transfer-in Brazilian Serie A club hi a zawm thei dawn. Mahse, a contract hmang zo kher loa lakluh dan an ngaihtuah mek.

Jorginho hian Flamengo hi a zawm a nih chuan December 2028 thleng khel turin contract a ziak ang. Flamengo hian June 17-ah Club World Cup-a an match hmasa ber an khel dawn a, ES Tunis an hmachhawn ang.

Group D-ah awmin, Chelsea leh LAFC emaw Club America emaw te chu an elpui tur an ni dawn bawk a, Jorginho hian US-a khelh tur Club World Cup hi khel hman se an duh.

Brazil-a piang, Italy-a seilian Jorginho hian Italian club Hellas Verona aṭanga a professional zinkawng zawh ṭanin, Sambonifacese (loan) ah a khel tawh bawk a, a lar chhuahna tak erawh Napoli a ni.

Napoli-ah hian kum li a khelh hnuin Chelsea-ah kum nga a khel leh a, January 2023 khan Emirates Stadium hi pound maktaduai 12 thlenga a man sang chho thei turin a zawm.

Thla 18 atan Gunners-ah hian contract a ziak zet a, May 2024 khan season khat dang atan a ziak leh a ni. London Hmar veng club tan hian match 79 a khel hman a, goal hnih khungin, assist vawi thum a nei a, nomawi chawi a nei lo.

Chelsea-ah khan Champions League, Europa League, UEFA Super Cup leh FIFA Club World Cup nomawi a chawi hman a, 2020-21 season khan UEFA Men's Player of the Year-ah thlan a ni bawk - league-ah a la champion miah lo thung!

Jorginho khelhna Arsenal hian May 25, Pathianni zan dar 8:30-ah Southampton lenchilhin, season an khar dawn a, Italy international Jorginho tan Gunners jersey nena a match hnuhnung ber tur a ni thei tawh ang.