Zaninah Serie A zo fel dawn

Italy rama football inelna sang ber Serie A season kal lai chu zanin hian a hmawr bawk a ni dawn - nizan khan champion tuma inum Napoli leh Inter Milan an inlan a, champion chu a chiang tawh ang.

Zaninah erawh season thara Champions League khel tur leh Serie B lama tlahniam turte chinfel a ni dawn thung - a sang zual pathum Napoli, Inter Milan leh Atalante te chu UCL khel tur hian an tling chiang tawh.

Palina Juventus chu dinhmun ṭha takah an ding mek bawk a, zanin hian Venezia an lenchilh ang - Old Lady tan an dinhmun tichiang turin chak a tawk a, point thum an hmu a nih chuan midang result ngaihchan tel ngai loin an tlang nghal ang.

Mahse, Juventus hi an chak lo a nih erawh chuan an hnuaia awm AS Roma leh Lazio te chuan an la tlanpel thei dawn a, parukna Lazio nen an inthlauhna chu point hnih chauh a la nih avangin an tan chetsual a remchang tawh lo.

League match 37 an khelh china point 18 chauh hmu Monza an tla chiang tawh a, an chunga awm Empoli leh Venezia te chu tla thei dinhmuna ding ni mah se an la him thut thei, 16-na Parma thlengin tla thei an la nih avangin match tawp ber hi a boruak a sang ngei ngei dawn.