Northeast Volleyball hruaitute inhmukhawm

Northeast Volleyball hruaitute chu volleyball hmasawnna tur hrang hrang relin meeting pawimawh tak an nei a. Mizoram Volleyball Association chuan lo mikhualin Tourist Lodge, Chaltlangah hun an hmang a ni.

Nilaini khan meeting neih zawh hman a nih loh avangin Ningani khan chhunzawm leh a ni a. Northeast Volleyball-in hma a sawn theihna tur thil chi hrang hrang ngaihtuahin Northeast Cup neih theih dan tûrte an ngaihtuah a. India rama Volleyball thuneitu sang ber Volleyball Federation of India-ah Northeast aṭanga hruaitu neih ve ṭha an tih thu an sawi ho bawk.

Mizoram Volleyball Association chuan LPS nen ṭangkawpa an buatsaih EverHome Pro Volleyball League 2025 neih mek chu Northeast Volleyball hruaitute hi a hmunah en puiin, Mizoram player-te hmasawnna, a buatsaihtute thawhrimna an fak hle.

Meeting hi MVA president Dr. Lalmalsawma Nghaka chuan kaihruaiin, Northeast Volleyball hruaitu rual kalkhawmten an ngaihdan leh duhdan hrang hrang an sawikhawm a ni.