Kum 23 hnuai lam basketball thiam ber Nursery

ICFAI University Inter Veng Under 23 Basketball Tournament-ah Nursery chuan Zarkawt 91-83 a hnehin an champion. Nursery champion puitu Emmanuel VL Awmpuia chu Most Valuable Player-a thlan a ni.

Inrinni zan final-ah Hawla Indoor Stadium, Republic Vengthlang khat vek mipui an pungkhawm a, inkhel a hmuhnawm bawk. Nursery-in bul an ṭan ṭha a, first quarter-ah 20-13 in hma an hruai nghal. Second quarter-ah Zarkawt rawn insiamrem hretin halftime-ah 44-39 a ni a, an inthlauhna chu point nga chauh a ni.

Nursery tan Khatla TBL player Emmanuel VL Awmpuia a hmuhnawm hle. Sangzela 3 points hmangin Zarkawt an rawn tho chhuak a, third quarter zawhah 65-65 a ni. Mahse, team ṭha zawk Nursery bawkin fourth quarter-ah bul an rawn ṭan ṭha a, a tawp thlengin hma an hruai tluan. Chutihrualin inkhel erawh a hmuhnawm tluan - Lalhnehpuia 3 point rawn neihte chuan Zarkawt tan beiseina rawn siam mah se a tawpah Nursery 91-83 in an chak ta zawk.