LBS Suzuki CYMA Football: Bawngkawn, Sialhawk, Durtlang an thiam

LBS Suzuki 22nd Inter Branch YMA Football Tournament 2025-ah Bawngkawn, Sialhawk leh Durtlang ten Inrinni khan an khingpui ṭheuh hnehin quarterfinal an lut. Team pariat la damte hi Aizawl veng Armed Veng South, Bawngkawn, Bethlehem Vengthlang, Durtlang leh Republic Veng bakah Aizawl pawn Kawnpui Vengthar, Kawnpui Venglai leh Sialhawk te an ni.

Quarterfinal hi vawiin aṭangin inelna chhunzawm a ni dawn a, tunkarah inelna hi zawm tum a ni. May 29, Ninganiah semifinal khelh a ni ang a, final hi May 31, Inrinniah khelh a ni dawn. Tun ṭum inelna hi chhunah vek khelh a ni dawn a, inkhelh hmabak hi RG Stadium-ah vek khelh tawh tur a ni ang.

Bawngkawn leh goal

Inrinni match hmasa berah Bawngkawn leh Leitan Ramthar an inhmachhawn a, team pahnih an inthlau deuh. Leitan Ramtharin a vawi khat nan team ṭha an hmachhawn a, fiahna paltlang lo mah se a thiam 16 zingah an tel avangin an thlen chinah an lawm tho ang.

RG Stadium-a inkhelah Bawngkawnin ṭan phat aṭangin inelna an thunun a, a khat mawi tawkin an ti goal. MS Dawngliana'n goal li a khung a, FC Bengaluru midfielder Lalremtluanga'n goal hnih a khung bakah K. Lalrinfela leh H. Lalmuankima ten goal khat ve ve an khung. Hun a tawp meuh chuan Bawngkawn 9-0 in an chak.

Crespo a vul

Sialhawk-in vawi nga champion tawh Armed Veng hnehtu Serchhip Vengchung an hmachhawn a, 7-3 in an sawp. RG Stadium-ah Sialhawkin an hlapui 'Unzi Lasi' an sa leh thei ta.

Goal 10 inkhelah Sialhawkin bul an ṭan ṭha a, R. Laldanmawia a la thiam reng. Minute 12-naah Sialhawk Express hian a hun ṭha neih hmasak chu chiang zetin a pet goal nghal. Crespo Vanlalhriatpuia a che ṭha zui a; Chanmari FC, Hyderabad reserve, Kerala Blasters reserve leh Diamond Harbour Under 21 tan a khel tawh hi team pahnihna danglamna a ni zui.

Crespo hian amahin a khalh tlang thei a, a ṭhiante a siam thei a; Serchhip Vengchungin dan ngaihna an hre lo. Crespo hian goal thum a khung a; Vanlalchanpuia, Vanlalremruatpuia leh Zoramsanga ten goal khat ṭheuh an khung. Serchhip Vengchungin a khat mawi tawkin khung ve mah se Sialhawk an tibuai pha lo a, Danmawia leh a ṭhiante 7-3 in an chak.

Durtlang tan Ricky

Inelna ṭan hma aṭanga champion tura rinkai Durtlang leh Chawnpui inkhel a hmuhnawm ta ber a, player ṭha bik Ricky Lallawmawma'n goal awmchhun a khung.

Chawnpuiin nung takin inkhel bul an ṭan a; David Laltlansanga (Avida) leh Amos Lalnienga te hmangin an nawr na hle. Mahse, Durtlangin Lalchungnunga an nei tlat a, Chawnpui tlarhmain a tawp thlen an harsat. Chutihrualin Durtlang an vannei tel a, box chhunga handball anga ngaih theih chu referee-in penalty a pe lo.

Chutihrualin team ṭha zawk erawh Durtlang an ni a, Aizawl FC wing back Lalfelkima chu winger anga hmangin Chawnpui tlarhnungten an dang thei lo. First half tawp hma chiahin Felkima ball pek chu box chhung aṭangin Rick-a'n chiang zetin a khung. Second half-ah inkhel a nung chhunzawm a, goal mamawh Chawnpui aiin Durtlang goal bawh a na zawk. A tawpah team ṭha zawk Durtlang 1-0 in an chak.