Quarterfinal-a en châkawm ber - Tlai dar 2:30-ah Bawngkawn Vs Bethlehem VT

LBS Suzuki CYMA Football-ah vawiin chawhnu dar 2:30 hian team ṭha pahnih Bawngkawn leh Bethlehem Vengthlang te an inkhel dawn a, veng mipui chauh ni loin tualchhung football tuipui pha tan chuan en châkawm a ni.

Coach leh fans

BVT hi coach ṭha Lalbiaksanga Colney enkawl a ni a, MPL leh All India Police Meet-a Mizoram Police a champion pui tawh bakah CYMA Football-ah captain anga Armed Veng a champion pui hnuah coach angin vawi thum a champion pui.

Bawngkawn lamin ziakin Lalruatliana Sailo (Tawia) chu coach angin ziak lo mah se AFC A Licence coach hian Bawngkawn hi a enkawl a, chutihrualin Tawia hian an veng Vaivakawn a enkawl avangin technical area-ah a ṭhu thei lo.

Vawiin inkhel tur hi team ṭha inbeihna a nih bakah coach ṭha inbeihna a ni a, entu an nei ṭha ve ve. RG Stadium hnaih zawk BVT hi entu ngah zawk tur an ni a, khelmual pawna BVT tluk tur chuan Bawngkawn lam an ṭan ve viau a ṭul ang.

Khelmual chhung

Bawngkawn leh Bethlehem Vengthlang te hi football thiam veng an ni ve ve a, mah se CYMA Football-ah an la champion ngai lo ve ve. Kumin hi veng pahnih hian hun ṭhaah an ngai dawn a, mah se team pakhat tan chauh hian semifinal kawng hawnsak an ni.

Bawngkawn hian tlarhma lamah MS Dawngliana an kawl a, Dawngtea hi pa lian lo mah se innghahna tham a tling. Mual sir lamah H. Lalmuankima te an la awm thei a, Aizawl FC midfielder Vanlalawmpuia leh Bengaluru FC midfielder Lalremtluanga te an nih avangin an tawh a khirh dawn.

Chutihrualin BVT hi an squad a chhah ṭha zawk. Goalkeeper ṭha Lalmuansanga an nei a, tlarhnungah PC Laldinpuia'n hoin, K. Lalmalsawma leh Hmingthanmawia te an awm bawk a, midfield-ah K. Lalṭhathanga, K. Lalramzauva leh Emmanuel Lalhruaizela te an nei. BS-a hote hi khawng ṭha viau mah se goal khungtu tur an nei ṭha tawh bik lo. MPL-a hming langsar ṭhin Lalrammawia chu tlarhma lamah an innghahna a ni.