Armed Veng South dal theitu Kawnpui Venglai

LBS Suzuki CYMA Football quarterfinal chu vawiin aṭangin khelh ṭan a ni dawn a, match hmasa berah vawiin chhun dar 11:00 hian Armed Veng South leh Kawnpui Venglai te an inkhel ang. Armed Veng South hian kuminah nomawi an beisei avangin chawhmaa inkhel tur pawh ni se ṭantu nei ṭha tura beisei an ni.

Mahse, AVS pawh champion rinkai an ni nachungin champion zia chhuah loh ṭum an nei a, Lungdai lakah pawh vanduai ṭum chu ni se tla thei an ni a. Chutihrualin a tawp thlengin an tlawm duh lo a, a tawpah hnehna an sual chhuak. Lalnunsanga (Tale) leh C. Ramdinmawia te hoin theihtawp an chhuah leh chuan Kawnpui Venglai laka chungnung thei an ni.

Kawnpui Venglai hian Hualngohmun an hneh thei a, team khaipa ni pha Lalengmawia an kawl. Engmawia hi an goal nawrna a nih rualin a ṭul hunah chuan goal vengtu zingah a tel thei a, a position dik tak pawh defensive midfielder a ni. Aizawl khaw pawn team-in hnehna chang turin fing taka AVS an hmachhawn a ṭul ang.